නිදි මාපිලා (Sri Lankan Cat Snake)

අද ලිපියෙන් අපි කතා කරන්න යන්නේ තවත් මාපිල් විෂේශයක් ගැනයි. නිදි මාපිලා කියලා සිංහලෙන් හදුන්වන මේ සර්පයව  Sri Lankan Cat Snake යන ඉංග්‍රීසි නාමයෙන්ද, Boiga ceylonensis යන විද්‍යාත්මක නාමයෙන්ද හදුන්වනවා. මෙයත් ශ්‍රී ලංකාවේ වැඩිම සර්පයින් සංඛ්‍යාවක් අයිති වෙන  Colubridae සර්ප කුලයට අයිති සර්පයෙක්. නිදි මාපිලාව වැඩි දුරටත් මෙන්න මේ විදිහට විද්‍යාත්මකව වර්ගීකරණය කරන්න පුලුවන්.

Kingdom:   Animalia

Phylum:   Chordata

             Class:     Reptilia

Order:    Squamata

Suborder: Serpentes

Family:    Colubridae

Subfamily:  Colubrinae

Genus:  Boiga

ශ්‍රී ලංකාවේ මීටර් 1500 කට වඩා අඩු පහත් බිම් වලත් අසල්වැසි ඉන්දියාවේ බටහිර  ප්‍රදේශ වලත් (Western Ghats) මේ සර්පයාව දැක ගන්න පුලුවන්. මධ්‍යම ප්‍රමාණයේ ශරීරයක් දරන නිදි මාපිලා අඩි හතරක් පමණ දිගකට වර්ධනය වෙනවා. හිස පැහැදිලිව ගෙලෙන් වෙන් වෙලා තියෙනවා. විශාල ප්‍රමාණයේ ඇස් මෙන්ම ඒ තුළ පිහිටි තිරස් කනිණිකාවක්ද දැක ගන්න පුලුවන්. පූසෙකුගේ ඇසට සමාන මේ පිහිටීම නිසා Cat Snake යන නම මේ සර්පයාට  ලැබෙන්න ඇතැයි හිතන්න පුලුවන්.

නිදි මාපිලා Boiga ceylonensis

ශරීරය අලු පැහැයට හෝ දුඹුරු පාටට හුරු පැහැයක් ගන්නා අතර තද දුඹුරු කලු පැහැයට හුරු විශාල තිත් ශරීරය පුරා විසිරී පවතිනවා . බද ප්‍රදේශයේදී මේ  තිත් ප්‍රමාණයෙන් විශාල වෙනවා. හිසේ පිහිටා තියන මිනිස් පෙනහැල්ලක හැඩැති කලු පැල්ලමද මුඛය දෙපස සිට ඇස් හරහා දිවෙන තද දුඹුරු කලු රේඛාවද මේ සර්පයා හදුනා ගන්න උදව් වෙනවා.

නිශාචර සර්පයෙක් වෙන නිදි මාපිලා ඉතාමත් කලාතුරකින් දිවා කල  දැක ගන්න පුලුවන්.පදුරු ආශ්‍රිතව දිවි ගෙවන මේ සර්පයා හූනන් මීයන් වැනි සතුන් දඩයම සදහා මිනිස් වාසස්ථාන වලටද පැමිනෙනවා.

තදින් කුපිත වූ අවස්තාවල ශරීරයේ ඉදිරි පෙදෙස දගරයක් ආකාරයට සකස් කරගෙන වලිගයද සොලවමින් සපා කෑමට පනිනවා. වලිගයෙන් ගස්වල එල්ලී සිටීමේ හැකියාවද මෙයාට තියෙනවා.

මධ්‍යම ප්‍රමාණයේ විෂ සහිත(mildly venomous) සර්පයෙක් වෙන නිදි මාපිලා සතුව Ophisthoglyphous ආකාරයේ විෂ දල පිහිටා තිබෙනවා. වැඩුනු ගැහැනු සර්පයෙක් පෙබරවාරි අප්‍රේල් අතර කාල වලදී වරකට බිත්තර 5 ත් 15ත් අතර සංඛ්‍යාවක් දැමීම සිදු කරනවා. වර්ධනය වූ පිරිමි සතුන් සාමාන්‍යයෙන් ගැහැනු සතෙකුට වඩා ප්‍රමාණයෙන් විශාල වෙනවා. නිදි මාපිලා ආහාර ලෙසට මීයන් කුරුල්ලන් හූනන් දඩයම් කිරීම සිදු කරනවා.

 නිදි මාපිලා දෂ්ඨ කළ පසු රෝගියා නින්‌දේදීම මිය යන බවට මිත්‍යා විශ්වාසයක් ඇතැම් මිනිසුන් තුළ පවතිනවා. ‌මොහු නිශාචර සර්ප‌යෙක් නිසා රාත්‍රියට ක්‍රියාශිලී ‌වෙනවා. එනිසා මිනිසුන්ට පහර දීම්ද සිදු වෙන්නෙත් රාත්‍රි කාල‌යටයි. නමුත් නින්‌දේදී මියයන මතය පදනම් විරහිතයි.

තදින් කුපිත වූ අවස්තාවල ශරීරයේ ඉදිරි පෙදෙස දගරයක් ආකාරයට සකස් කරගන්නවා.

වලිගයෙන් ගස්වල එල්ලී සිටීමේ හැකියාවද නිදි මාපිලා සතුයි.

(ඡායාරූප http://en.wikipedia.org වෙබ් අඩවියෙනි)

මහවාලක්කඩියා.. (Stoke's Sea Snake)

අද අපි කතා කරන්න යන්නේ මුහුදු සර්පයෙක් ගැන. මෙයා තමයි මහවාලක්කඩියා එහෙමත් නැත්නම් Stoke's Sea Snake කියලා ඉංග්‍රීසි  භාෂාවෙන් හදුන්වන සර්පයා. මෙයා උග්‍ර විෂ සහිත සර්පයෙක්. Astrotia stokesii කියන විද්‍යාත්මක නමින් හදුන්වන මේ සර්පයා මෙන්න මේ විදිහට ජෛව විද්‍යාත්මකව වර්ගීකරණය කරන්න  පුලුවන්.

Kingdom : Animalia

Phylum : Chordata

Class : Reptilia

Order : Squamata

Suborder : Serpentes

Family : Hydrophiidae

Genus : Astrotia

Species : A. stokesii

Binomial name : Astrotia stokesii (Gray, 1846)

 ශ්‍රී ලංකාවේ උතුරු, බස්නාහිර, වයඹ සහ දකුණු වෙරළබඩ ආශ්‍රිත මුහුදේ වගේම ගැඹුරු මුහුදේ දීත් මේ සර්පයාව හම්බුවෙනවා. ලංකාව වගේම ගල්ෆ් මුහුදු තීරය ඉන්දියාව, තායිලන්තය, මැලේසියාව, පැපුවා නිව්ගිනියාව, පිලිපීනය, ඔස්ට්‍රේලියාවේ උතුරු හා නැගෙනහිර වෙරල  තීරය, චීන මුහුද ආශ්‍රිත වෙරල තීරයෙනුත් මෙයාව බහුලව හම්බුවෙනවා.

මේ සර්පයා අනෙක් මුහුදු සර්පයින්ට සාපේක්ෂව  තරමක් විශාල ශරීරයකට උරුමකම් කියනවා. ඒත් අනෙක් මුහුදු සර්පයින් තරම් දිගට  වැඩෙන්නේ නෑ. කෙටි ශරීරයක් තමයි මෙයාට තියෙන්නේ. විශාල හිසක් තියෙනවා. ශරීරය තරමක්  පැතලි ස්වාභාවයක් ගන්නවා. මුහුදු ජලයේ වැඩි වෙලාවක් ජීවත් වෙන් නිසා මෙයාගේ ශරීරගේ ගොඩක් වෙලාවට ඇල්ගී වර්ග , කුඩා බෙල්ලන් සවිවෙලා ඉන්නවා දැක ගන්න පුලුවන්.

කුඩා කාලයේදී මේ සර්පයාගේ ශරීරය පෘෂ්ඨීයව  සුදු, කහ, හෝ දුඹුරු පාටක් ගන්නවා. කලු හෝ තද දුඹුරු පාට වලලු 24ත් 34ත් අතර සංඛ්‍යාවක්  ශරීරය දිගේ පිහිටලා තියෙනවා. ඇතැම් වෙලාවට මේ වලලු අතර කුඩා තිත් දැක ගන්න පුලුවන්. හොදින් වැඩුනු සර්පයෙක් ගේ ශරීරය දුඹුරු පැහැයට හුරු පැහැයක් ගන්නවා. උදර  ප්‍රදේශය සුදු පැහැයක් ගන්නවා. 

 මහවාලක්කඩියා ඇතැම් වෙලාවට විශාල  කණ්ඩායම් ලෙසට මුහුදේදී හමුවෙනවා. මෙයා සෙමින්  සංචරණය කරන සර්පයෙක්. ඒත් තරමක් ආක්‍රමණශීලී සර්පයෙක්.

අන්ඩ ජලාබුජ සර්පයෙක් වෙන මහවාලක්කඩියා එක්  ප්‍රඡනන සමයකදී ජනිතයින් 12ක් පමණ මෙලොවට බිහිකරනවා. උපතේදී 300mm  පමණ දිගකින් යුක්ත වුවත් මේ සර්පයා 1 /1.5m පමණ දිගකට වර්ධනය  වෙනවා.

මේ සර්පයා මුහුදු පත්ලේ ආහාර මත යැපෙනවා. මහවාලක්කඩියා රතු දත්ත පොතේ Least Concern (LC) කාණ්ඩය යටතේ වර්ග කර තියෙනවා. මුහුදේදී ධීවරයත්ගේ දැල් වලට හසුවීම වර්තමානයේ මේ සර්පයාට ඇති ප්‍රබලතම තර්ජනය බවට පත්වෙලා තියෙනවා.

මහවාලක්කඩියා

                          ඡායාරූප- http://www.pbase.com/wildlifeimages/image

ලේ මාපිලා.. (Forsten's Cat Snake)

 ශ්‍රී ලංකාවේ ගොඩක් මිත්‍යා කතා වලට පදනම් වෙච්ච සර්පයෙක් ගැන තමයි අද කතා කරන්න යන්නේ. මේ සර්පයාව ලේ මාපිලා / නාග මාපිලා එහෙමත් නැත්නම් කබර මාපිලා කියලා හදුන්වනවා. ඉංග්‍රීසි භාෂාවෙන් Forsten's Cat Snake කියලා හදුන්වන මෙයාගේ විද්‍යාත්මක නම Boiga forsteni. (Dumeril, Bibron & Dumeril, 1854)

ඒ වගේම මෙයාව මෙන්න මේ විදිහට විද්‍යාත්මකව වර්ගීකරණය කරන්න පුලුවන්.

ලේ මාපිලා /Boiga forsteni දුඹුරු පාට

Kingdom:  Animalia

Phylum:     Chordata

Class:         Reptilia

Order:        Squamata

Suborder:  Serpentes

Family:      Colubridae

Subfamily:      Colubrinae

Genus:          Boiga

ලංකාව හැරුනු කොට නේපාලය , ඉන්දියාව, වගේ රට වලදීත් මෙයාව දැක ගන්න පුලුවන්.

ශ්‍රී ලංකාවේ කන්නෙලිය සිංහරාජය අකුරැස්ස කුමන මින්නේරිය  වගේ පහතරට තෙත් අතරමැදි මෙන්ම වියළි කලාප වලින්ද වාර්තා වෙලා තියෙනවා.

පැහැදිලි ත්‍රිකෝණාකාර හිසක් දරන මෙයාගේ ශරීරය සිහින් දිගටි එකක්. හිස පැහැදිලිව ගෙලෙන් වෙන්වෙලා තියෙනවා.

 පූසෙකුගේ මෙන් විශාල ඇස් පිහිටනවා ඇසේ මැද සිරස්  කණිනිකාවක් පිහිටලා තියෙනවා. විවිධ වර්ණයෙන් යුක්ත නිදර්ශක හමුවී ඇත. දුඹුරු හෝ අලු පැහැයට හුරු ශරීරයේ කලු හෝ සුදු පාට පැල්ලම් දකින්න පුලුවන්. සමහර විට කහ තැඹිලි වර්ණ දරන අතර රතු පාට හරස් ඉරි දැක ගන්න පුලුවන්. බඩ පැත්ත සුදු හෝ ලා කහ පාටින් යුක්තයි.

සිහින් දිගු තියුනු කෙලවරක් සහිත වලිගයක් මේ සර්පයාගේ දැක ගන්න පුලුවන්.

නාග මාපිලා මද විෂ සර්පයෙක්. Ophisthoglyphous ආකාරයේ දළ දැක ගන්න පුලුවන්. මොහුගේ දෂ්ඨනය මාරාන්තික නොවුවත් දෂ්ඨ කල ස්ථානය ඉදිමීම, වේදනාවක් ඇතිවීම වගේ ලක්ෂණ පෙන්නුම් කරන්න පුලුවන්.

නිශාචර රැක්ෂවාසී සර්පයෙක් වෙන නාග මාපිලා දිවා කාලෙට ගස් බෙන ආදී ස්ථාන වල හැංගිලා ඉදලා රාත්‍රියට ක්‍රියාශීලි වෙනවා. බිය වුනාම දගර ගැසිලා වලිගය හකුලා සපා කෑමට පනිනවා.

සෙමින් සංචරණය කරන මේ සර්පයා බොහෝ විට මිනිස් වාසස්ථාන වලට ඇතුලු වූ අවස්ථා වාර්ථා වෙනවා.

බිත්තර මගින් පැටවුන් බෝ වීම සිදු වෙනවා. වැඩුනු සතුන් අගෝස්තු සැප්තැම්බර් වගේ කාල වලදී වරකට බිත්තර 5ත් 10ත් අතර සංඛ්‍යාවක් දමනවා කියලා හොයාගෙන තියෙනවා.

මෙයා මීටර 1.5- 2 ක් දිගකට වැඩෙනවා.

ලේ මාපිලා කුඩා ක්ෂීරපායින් කුරුලු බිත්තර ගෙම්බන් හිකනලුන් මීයන් ආදී සතුන් ආහාරයට ගන්නවා.

ලේ මාපිලන්  හත් ‌දෙ‌නෙකු රාත්‍රියට ඇවිල්ලා  වහ‌ලේ එල්ලිලා  නිදා ගෙන ඉන්න පුද්ගලයින්‌ගේ පාද‌යේ මහපට ඇගිල්ල සිදුරු කර ‌ලේ උරා බොනවා කියලා ගොඩක් ගම්බද පුද්ගලයින් විශ්වාස කරනවා. ‌ ලේ උරා බිබ්වට පස්සේ ‌ලේ හිඟවීම නිසා අදාල පුද්ගලයා නින්‌දේදීම මිය යනවා කියලත් එයාලා හිතාගෙන ඉන්නවා. 

මේක සම්පූර්ණයෙන්ම මිත්‍යා මතයක්,‌ලේ මාපිලාට එම නම පටබැදෙන්න උ‌ගේ ශරීර වර්ණය දායක වන්නට ඇතැයි හිතන්න පුලුවන්.  ලේ මාපිලා සතුව තියෙන පරිග්‍රාහී වලිගය නිසා යමක එල්ලී සිටී‌මේ හැකියාව තිබුනත් ලේ උරා බීමක් සිදු කරන්නේ නෑ. ඒ විතරක් නෙමෙයි ‌ලේ උරා ‌බොන කිසිදු සර්ප‌යෙක් ලංකාව තුළින් මෙතෙක් වාර්තා වෙලත් නෑ.

ලේ මාපිලා /Boiga forsteni රතු පාට

ලේ මාපිලා /Boiga forsteni කලු පාට

                                (ඡායාරූප www.superstock.com www.srilankanreptiles.com)

කටකලුවා... ( Trinket Snake)

 අපේ  රටේ තරමක් විතර බහුලව හම්බුවෙන සර්පයෙක් විදිහට කටකලුවා හදුන්වන්න පුලුවන්. මේ සර්පයා අපේ රටේ වගේම ඉන්දියාව, පකිස්ථානය, නේපාලය , බංගලාදේශය වගේ අනෙකුත් දකුණු ආසියාතික රටවලත් ජීවත් වෙනවා.
  ශ්‍රී ලංකාවේ මුහුදු මට්ටමින් 1000m දක්වා වූ   තෙත් අතරමැදි හා වියළි කලාප වලින් මේ සර්පයා හමු වෙලා තියෙනවා. ඉංගීසි භාෂාවෙන් කියලා හදුන්වන මේ සර්පයාව විද්‍යාත්මකව හදුන්වන්නේ Coelognathus Helena (Daudin, 1803) කියලය්. මෙයාව මෙන්න මේ විදිහට ජෛවවිද්‍යාත්මකව වර්ගීකරණය කරන්න පුලුවන්.

Trinket Snake

Kingdom:    Animalia
Phylum:      Chordata
Class:          Reptilia
Order:         Squamata
Suborder:    Serpentes
Family:       Colubridae
Subfamily: Colubrinae
Genus:        Coelognathus
ලෝකය පුරා විශේෂයෙන්ම ඉන්දියාවේ මෙයාලගේ උප විෂේශ දෙකක් ජීවත් වෙනවා කියලා සදහන් වෙනවා.
Coelognathus helena helena
Coelognathus helena monticollaris  (Collard Trinket Snake)

කොහොම උනත් මේ දෙවෙනියට සදහන් කල විෂේශය ඉතාමත් කලාතුරකින් ඉන්දියාවේ කදුකර ප්‍රදේශ වලින් හමුවෙන බව තමයි වාර්තා වෙන්නේ.

කටකලුවා මධ්‍යම ප්‍රමානයේ ශරීරයක් දරන තරමක් සිහින් සර්පයෙක්.  කෙටි වලිගයක් තියෙන මේ සර්පයාට පැහැදිලි ගෙලක් පිහිටා තියෙනවා. ඒ වගේම තරමක් විශාල ඇස් වල තද කලුපාට විශාල කනිනිකාවක් පැහැදිලිවම දැක ගන්න පුලුවන්. සෙන්ටිමීටර 80 -120 පමණ දිගකට වර්ධනය වෙනවා.

දුඹුරුපාටට හුරු ශරීරයේ මැද  ප්‍රදේශයේ කලු පාට ඉරක් පිහිටලා තියෙනවා. වැඩුනු සර්පයින් තද දුඹුරු පාටයි.
කොහොම උනත් මේ සර්පයත් විෂ රහිත සර්පයෙක් විදිහට හදුන්නලා දෙන්න පුලුවන්. මෙයා බය වුනාම ප්‍රධාන වශයෙන්ම වේගයෙන් පලා යෑම  සිදු කරනවා. එහෙම බැරි වුනොත් වලිගය වනමින් ශරීරයේ පූර්ව කොටස ඉහලට කරලා මුඛය විවෘත කර පහර දීමට පෙළඹෙනවා. ඒ වගේ වෙලාවට ශරීරයේ ඉහල  කොටස S හැඩයට සකස් වෙලා තියෙනවා බලා ගන්න පුලුවන්. සපා කෑ ස්ථානය ඉදීමීමකට ලක්වෙන්න පුලුවන්, ඇතැම් විටක රුධිර වහනයක් වුනත් සිද්ධ වෙන්න පුලුවන්.

 කට කලුවාගේ මුඛය විවෘත කලාම  කලු පාටින් යුක්තයි. මේ හින්දා මේ සර්පයාට එම නම ලැබෙන්න ඇතැයි කියලා විශ්වාස කරන්න පුලුවන්.


මේ සර්පයා දිවා රාත්‍රී දෙකටම ක්‍රියාශීලී වෙන භෞමික වාසී සර්පයෙක්. ගස් හා පදුරු ආශිතව දැක ගන්න පුලුවන්. තද නියග කාලවලදී ගස් බෙන හා ගුල් වල හැංගිලා ඉන්නවා. ඉතාම වේගවත් සංචරන හැකියාවක්  කටකලුවා සතුව පවතිනවා, බොහෝවිට ජෝඩු වශයෙන් හමුවේ. ගැහැණු සතුන් පිරිමි සතුන්ට වඩා දිගින් වැඩියි.

 ගෙම්බන් කුරුල්ලන් හිකනලුන් වගේ සත්තු තමයි මෙයාලා වැඩිපුර ආහාරයට ගන්නේ.  

පැටවු බෝ වීම බිත්තර මගින් සිද්ධ වෙනවා. ගැහැනු සතෙක් වරකට බිත්තර 3ත් 12ත් අතර සංඛ්‍යාවක් දානවා . දින 70ත් 90ත් අතර කාලයකට පසුව බිහිවෙන පැටවු 200-250mm අතර දිගකින් යුකුත වෙනවා.

කට කලුවාගේ මුඛය විවෘත කලාම  කලු පාටින් යුක්තයි.

කටකලුවා  මිනිසුන්ට දෂ්ඨ කලාට පස්සේ  අසල තියෙන ගසකට නගින බවත් ‌රෝගියා මිය යන ‌තෙක් ග‌ස උඩට වෙලා ඉදලා ‌රෝගියා මියගියාට පස්සේ පසු ග‌සෙන් බැහැලා  යනවා කියලත් සමහර අය විශ්වාස කරනවා. මේක මිත්‍යා මතයක්, කලිනුත් කිව්වා වගේ කටකලුවා මිනි‌සෙකුට මරණය ‌ගෙන දීමට තරම් විෂ තියෙන සර්පයෙක් නෙමෙයි. ‌භෞමික හා අර්ධ ‌ලෙස රුක්වාසි‌යෙකු වෙන මේ සර්පයා බොහෝ වෙලාවට ගස් උඩ නම් දැක ගන්න නම් පුලුවන්.


 

ජායාරූප- www.ratsnakezone.com   http://farm3.static.flickr.com    www.thegardensofeden.org

මල්සරා..... (Ornate Flying Snake)

ශ්‍රී ලංකාවේදී හමුවෙන සර්පයින් අතරින් ගොඩක් ලස්සන සර්පයෙක් විදිහට මල්සරාව එහෙමත් නැත්නම් පොල්මල් කරවලාව හදුන්වන්න පුලුවන්.  

ඉංග්‍රීසියෙන් golden tree snake, gliding snake, ornate flying snake, golden flying snake,  gold and black tree snake, flying tree snake වගේ නම් ගොඩකින් මෙයාව හදුන්වනවා.

Chrysopelea ornata  (Shaw, 1802)කියන විද්‍යාත්මක නාමයෙන් හදුන්වන මේ සර්පයා මේ විදිහට විද්‍යාත්මකව වර්ගීකරණය කරන්න පුලුවන්.

Kingdom:             Animalia

Phylum:               Chordata

Subphylum:        Vertebrata

Class:                    Reptilia

Order:                  Squamata

Suborder:            Serpentes

Family:                 Colubridae

Subfamily:           Colubrinae

Genus:                 Chrysopelea

Species:               C. ornate

ලෝකය පුරා මෙයාලගේ ප්‍රධාන උප විෂේශ 3ක් හමුවෙනවා.

Chrysopelea ornata ornata (Shaw, 1802)

Chrysopelea ornata ornatissima (Werner, 1925)

Chrysopelea ornata sinhaleya (Deraniyagala, 1945)

ලංකාවේ තෙත් අතරමැදි හා වියළි කලාප වල දැක ගන්න පුලුවන්. බලංගොඩ ගාල්ල  යාල පුත්තලම  ප්‍රදේශ වලින්ද හමුවෙලා තියෙනවා.

Chrysopelea ornata සාමාන්‍යයෙන් කොළ පාටට හුරු ශරීර වර්ණයක් දැරුවත් ලංකාවේ හමුවෙන මල්සරා ගොඩක් ලස්සනයි. ශරීර වර්ණය පුෂ්ඨියව කලු පාටක් ගන්නවා. එහි හරස් අතට කහ පැහැති පේලි දැක ගන්න පුලුවන්. ඒ විතරක් නෙමෙයි ශරීරය මධ්‍යයෙහි රතු පාට තිත් ද සමහර අවස්ථා වල කහ පැහැති තිත්ද දැක ගන්න පුලුවන්. මේ විදිහට වර්ණවත් ශරීරයක් තියෙන හින්දා මෙයාව පහසුවෙන් වෙනත් සර්පයෙකුගෙන් වෙන් කරලා අදුර ගන්න පුලුවන්.

පැතලි හිසක් සහ හැකිලුනු ගෙලක් මේ සර්පයාගෙන් දැක ගන්න පුලුවන්. ඇසේ විශාල රවුම් කනිකාවක් පිහිටනවා. මෙයාලා සෙන්ටිමීටර 80- 120 පමණ දිගකට වැඩෙනවා.

මද විෂ  සහිත සර්පයෙක් විදියට තමයි පොල්මල් කරවලාව හදුන්වන්නේ.මෙයාලා නිතරම ගස් හා පදුරු අතර වාසය කරනවා.

සමහර වෙලාවට ගස් වල තරමක් උසින් තියෙන අතු වලත් මෙයාලා දැක ගන්න පුලුවන්. උස ස්ථානයක ඉදලා පහල ස්ථානයකට පැනීමේ හැකියාවකුත් මෙයාලට තියෙනවා. මේ හින්දා මෙයාලට Flying Snake කියලා නම හැදෙන්න ඇති කියලත් හිතන්න පුලුවන්.

ඉතා වේගයෙන් සංචරණය කිරීමේ හැකියාවක් තියෙනවා.

හූනන් වවුලන් ආහාරයට ගන්නා මේ සර්පයා සතුව තියෙන තියුනු ඇස් ඉගිලෙන පක්ෂීන් අල්ලා ගැනීමට ආධාර වෙනවා.මොහුගේ බෝවීම බිත්තර මගින් සිදුවෙනවා. වර්ෂාව තියෙන කාලෙට ගැහැනු සර්පයා වරකට බිත්තර 6ත් 12ත් අතර සංඛ්‍යාවක් දැමීම සිදු කරනවා.

                                   Chrysopelea ornata ornatissima සර්පයෙක් බිජු මගින් බිහිවෙන අවස්ථාව

Chrysopelea ornata

(ඡායාරූප www.breeders-expo.de, www.picstopin.com, www.herpnation.com)