Sunday, September 10, 2017

මුහුදේ වෙසෙන තවත් සර්පයෙක් - වයිරන් මුහුදු නයා

වයිරන් මුහුදු නයා හෙවත් ඉංග්‍රීසි භාෂාවෙන් Annulated Sea Snake හෝ Blue-Banded Sea Snake යනුවෙන් හදුන්වන මෙම මුහුදු සර්පයා උග්‍ර විෂ සහිත සර්පයෙකි. ශ්‍රී ලංකාව හැරුනු විට ඉන්දියන් සාගරයේ පිහිටා ඇති බංගලාදේශය, ඉන්දියාව, පකිස්ථානය, මියන්මාරය., තායිලන්තය වැනි රටවලින් මෙන්ම පර්සියන් ගල්ෆ් වෙරළ තීරය  හා දකුණු චීන මුහුදු වෙරළ තීරය ආශ්‍රිතව හමුවේ.
ශ්‍රී ලංකාවේ උතුරු බටහිර නැගෙනහිර වෙරළබඩ ආශ්‍රිතව වෙසේ. මන්නාරම කුමන පානම වැල්ලවත්ත මීගමුව පුත්තලම කළුතර ආදී ප්‍රදේශ වලින් හමුවී ඇත. Hydrophis cyanocinctus යන විද්‍යාත්මක නාමයෙන් හදුන්වන මෙම සර්පයා Elapidae කුළයට අයත් වෙන අතර මේ ආකාරයට වැඩි දුරටත් වර්ගීකරණය කරනු ලබයි.
ශරීරයේ කලු පාට පටි  දැකිය හැක
වයිරන් මුහුදු නයා

Kingdom :   Animalia 
Phylum : Chordata
Class :  Reptilia
Order : Squamata
Suborder :  Serpentes
Family :  Elapidae
Genus :  Hydrophis

මධ්‍යම ප්‍රමානයේ  ශරීරයක් දරන මෙම සර්පයාගේ හිස කුඩා වන අතර ශරීරයෙන් පැහැදිලිව වෙන්ව නැත. කොළ පාටට හුරු කහ පාට ශරීරයේ කලු පාට පටි ඇතැම් විට දැකිය හැක.
ඉතා ආක්‍රමණශීලී සර්පයෙකු වන අතර  උග්‍ර විෂ සහිතයි. 120- 170 cm පමණ දිගකට වැඩේ. මත්සයින් හා මුහුදේ ඇති දෑ ආහාරයට ගනී.


හිස කුඩා වන අතර ශරීරයෙන් පැහැදිලිව වෙන්ව නැත
Hydrophis cyanocinctus ගේ හිස

වයිරන් මුහුදු නයා

ශරීරයේ කලු පාට පටි  දැකිය හැක

සියලුම ඡායාරූප - https://alchetron.com වෙබ් අඩවියෙන් උපුටා ගන්නා ලදී.

Sunday, July 31, 2016

පලාබරියා - Green Keelback

පලාබරියා හෙවත් Green Keelback යන නමින් හදුන්වන සර්පයා ශ්‍රී ලංකාව හැරුනු විට ඉන්දියාව පකිස්ථානය මියන්මාරය වැනි ආසියාතික රට වලින් හමුවේ. ශ්‍රී ලංකාව තුළ මුහුදු මට්ටමින් මීටර් 1000 දක්වා සීගිරිය, නකල්ස්, බණ්ඩාරවෙල, දඹුල්ල, ත්‍රිකුණාමලය,  පොලොන්නරුව, පේරාදෙනිය, නමුනුකුල සහ හපුතලේ ආදී ප්‍රදේශ වලින් වාර්තා වී ඇත. Macropisthodon plumbicolor යන විද්‍යාත්මක නාමයෙන් හදුන්වන මෙම සර්පයා මේ ආකාරයට වැඩි දුරටත් වර්ගීකරණය කරනු ලබයි.

Kingdom:   Animalia
Phylum:     Chordata

Class:         Reptilia
Order:         Squamata
Suborder:   Serpentes
Family:      Colubridae
Genus:        Macropisthodon






Macropisthodon plumbicolor palabariya  (Sri Lankan Green Keelback) යන  උප විශේෂය මෙරටට ආවේනික වේ.
 හොදින් වැඩුනු සතුන්ගේ ශරීරය කහ පාටට හුරු කොළ පැහැයක් ගන්නා අතර කුඩා කලදී අදුරු කොළ පැහැයක් ගනී. කුඩා සහ තරුණ අවධි වල පසුවන සතුන්ගේ ශරීර වල කලු පැහැති රේඛා දැකිය හැකි අතර ක්‍රමයෙන් වයසට යත්ම එම රේඛා නැතිවී යයි. ශරීරයේ යටි පැත්ත සුදු පාටින් යුක්ත වේ. කුඩා කල සතුන්ගේ ගෙලෙහි ඉංග්‍රීසි “A” අකුරක හැඩති   කලු පාටින් යුත් පැල්ලමක් දැකිය හැක.
මධ්‍යමප්‍රමාණයේ ශරීරයක් දරයි. කුඩා කළ මදක් ඕවලාකාර හිස වැඩුනු විට ත්‍රිකෝණාකාර හැඩයක් ගනී. හිස ගෙළ රගින් ශරීරයෙන් වෙන්ව ඇත. කෙටි වලිගයක් දරයි. ඇස් වල ගෝලාකාර කණිනිකාවක් පිහිටයි.
වනාන්තර, තෘණ භූමි, කෘෂිකාර්මික බිම් ගෙවතු ආශ්‍රිත කොල රොඩු හා ගල් අතර හමුවේ. බොහෝ විට වේගයෙන් පලා යයි. පලි බරියා විෂ රහිත නිශාචර සර්පයෙකි. භෞමිකව වාසය කරන මෙම සර්පයා සෙන්ටිමීටර් 40 50 පමණ දිගකට වැඩේ. වැඩි වශයෙන් ගෙම්බන් හා මැඩියන් ආහාරයට ගනී.


Sunday, April 10, 2016

කදුකර මූකලන් තෙලිස්සා - Highland Hump-nosed Pit Viper

 කදුකර මූකලන් තෙලිස්සා යනු මෙරටට ආවේනික විශ සහිත සර්පයෙකි.
මුහුදු මට්ටමින් මීටර් 2000 දක්වා වූ කදුකර වනාන්තර වල වෙසේ. පේරාදෙනිය සිංහරාජය නකල්ස් හන්තාන කන්නෙලිය  ආදී ප්‍රදේශ වලින් හමුවී ඇත. Hypnale nepa යන විද්‍යාත්මක නමින් හදුන්වන කදුකර මූකලන් තෙලිස්සා මෙලෙස වැඩිදුරටත් ජෛවවිද්‍යාත්මකව වර්ගීකරණය කල හැක.

Kingdom:    Animalia
Phylum:      Chordata
Subphylum: Vertebrata
Class:           Reptilia
Order:         Squamata
Suborder:    Serpentes
Family:       Viperidae
Subfamily:  Crotalinae
Genus:        Hypnale

මධ්‍යම ප්‍රමාණයේ සිලින්ඩරාකාර ශරීරයක් ඇත. හිස ගෙළින් වෙන් වී පවතී.  කුඩා නාස් පුඩු දරයි. රවුම් ඇස් තුළ  ඉලිප්සාකර කනිනිකාවක් දැකිය හැක. ශරීර වර්ණය විවිධාකාර වේ.  බොහෝ විට  අදුරු හෝ ලා දුඹුරු පාට වේ. ඇතැම් විට  ශරීරය පුරා කලු පාට පුල්ලි දැකිය හැක. ශරීරයේ යටි පැත්ත සුදු හෝ අලු පාටක් ගනී. රතු හෝ දුඹුරු පාට තිත් දැකිය හැක.
මධ්‍යම ප්‍රමාණයේ විෂ සහිතයි.  සපා කෑ ස්ථානයේ ඉදිමීමක් ඇතිවේ.  තුවාලයේ ඇතිවන වේදනාව දින කිහිපයක් යන තුරුද පවතී.

තෙත් වනාන්තර වල සහ  කදුකර වගාබිම් වල හමුවේ. රාත්‍රී කාලයේ මෙන්ම  දිවා කාලයේද දැකිය හැක. භෞමික සර්පයෙකු වුවත්  ඇතැම් විට කුඩා ගස්මතද හමුවේ. ඇතැම් විට පදුරු වල දගර ගැසී සිටී. පහර දීම සදහා දුරට පැනීමේ හැකියාව ඇත. සෙන්ටිමීටර් 30-35 පමණ දිගකට වැඩේ. සිකනලුන්, ගෙම්බන්, මීයන් ආහාරයට ගනී.




ජායාරූප http://www.arkive.org/sri-lanka-humpnose-viper/hypnale-nepa

Saturday, February 20, 2016

අපේ රටට ආවේණික සර්පයෙක්.. පුල්ලි දත්කැටියා - Streaked Kukri Snake

පුල්ලි දත් කැටියා මෙරටට ආවේනික සර්පයෙකි. පහතරට තෙත් කලාපය මධ්‍යම කදුකරයේ නකල්ස් ගම්පොළ මහනුවර කලුතර රත්නපුර කොත්මලේ මීගමුව ආදී ප්‍රදේශ වලින් වාර්තා වී ඇත. මෙම ලිපිනයෙන් පුල්ලි දත් කැටියාගේ ව්‍යාප්තිය බලා ගත හැක.
Colubridae සර්ප කුළයට අයත් පුල්ලි දත් කැටියා Oligodon sublineatus යන විද්‍යාත්මක නාමයෙන් හදුන්වන අතර පහත පරිදි වර්ගීකරනය කරනු ලබයි.
Kingdom:       Animalia
Phylum:         Chordata
Subphylum:   Vertebrata
Class:            Reptilia
Order:           Squamata
Suborder:     Serpentes
Family:        Colubridae
Subfamily:   Colubrinae
Genus:        Oligodon
සිලින්ඩරාකාර ශරීරයේ ඕවලාකාර හිසක් දරයි. ඇසේ ගෝලාකාර කනිනිකාවක් ඇත.  ක්‍රමයෙන් සිහින් වූ වලිගයක් ඇත. දුඹුරු පාට හිසේ සහ ශරීරයේ කලු පාට පැල්ලම් දැකිය හැක. කලු පාට රේඛා දෙකක් ගෙලේ සිට වලිගය කරා දිවේ.
පුල්ලි දත් කැටියා විෂ රහිත සර්පයෙකි. දිවා සහ සන්ධ්‍යා කාල වල වැඩිපුර හමුවන අතර බොහෝ විට දිරාගිය කොළ රොඩු  ආශ්‍රිතව හමුවේ. වර්ෂා සහිත කාල වල වැඩිපුර මුන ගැසෙන අතර ඇතැම් විට මිනිස් වාසස්ථාන වලටද ඇතුලු වේ.

මෙම සර්පයා 40- 50 cm පමණ දිගකට වර්ධනය වේ. කුඩා කෘමින් මැඩියන් ආහාරයට ගනී. IUCN රතු දත්ත පොතේ මෙම සර්පයා Least Concern (LC) කාණ්ඩය යටතේ වර්ගීකරනය කරනු ලබයි.
බොහෝ විට දිරාගිය කොළ රොඩු  ආශ්‍රිතව හමුවේ


ජායාරූප- http://www.arkive.org/

Sunday, November 15, 2015

දැතිගෝමරයා..Black headed Snake



දැතිගෝමරයා හෙවත් ඉංග්‍රීසි භාෂාවෙන් Jerdon’s Polyodent හෝ Black-headed Snake යන නම් වලින් හදුන්වන මෙම සර්පයා ඉන්දියාව, ශ්‍රී ලංකාව සහ බංගලාදේශය යන රටවලින් පමණක් හමුවේ.  Sibynophis subpunctatus ceylonicus යන උප විෂේශය මෙරටට ආවේනික වේ.  ශ්‍රී ලංකාවේ මුහුදු මට්ටමින් 750 m දක්වා උසකට තෙත් හා වියළි කලාප වල දක්නට ලැබේ. පානදුර ගාල්ල කොළඹ පුත්තලම සිංහරාජය දෙනියාය කලුතර ප්‍රදේශ වලින් හමුවී ඇත.
Colubridae කුලයට අයත් මෙම සර්පයා පහත පරිදි වැඩිදුරටත් වර්ගීකරණය කළ හැක.

Sibynophis subpunctatus
Kingdom:    Animalia
Phylum:      Chordata
Class:          Reptilia
Order:         Squamata
Suborder:    Serpentes

Family:       Colubridae
Subfamily:  Colubrinae
Genus:        Sibynophis

මධ්‍යම ප්‍රමාණයේ සිලින්ඩරාකාර ශරීරයක් දරයි. විශාල ඇස් තුළ රවුම් කණිනිකාවක් දැකිය හැක. ක්‍රමයෙන් සිහින් වන දිගු වලිගයක් දැකිය හැකි අතර  ලා දුඹුරු පාට ශරීරයේ තද දුඹුරු පාට තිත් විශාල ගණනක් ඇත. කලු පාට හිසේ කහ පාට වලල්ලක් දැකිය හැක. තොල් හා හිසේ යට කොටස කහ පාටයි.

නිර්විෂ සර්පයෙකු වන දැති ගෝමරයා  දිවා කාලයේ සහ රාත්‍රි කාලයේ දෙකේදීම දැකිය හැක. කෘෂිකාර්මික බිම් වල නිරන්තරයෙන් හමුවන අතර භෞමිකවාසී සර්පයෙකි. වැඩි වේලාවක් විට දිරාගිය කොටන් යට සහ ගල් යට සැගවී සිටී. බොහෝ විට පහර දීමක් සිදු නොකරයි. හොදින් වැඩුනු සරිපයෙකු 20 -35  cm පමණ දිගකින් යුක්ත වන අතර ආහාර වශයෙන් ගෙම්බන් කුඩා සර්පයින් හූනන් මෙන්ම හිකනලුන්ද දඩයම් කරනු ලබයි.

කලු පාට හිසේ කහ පාට වලල්ලක් දැකිය හැක




ඡායාරූප උපුටා ගැනීම
indiansnakes.org
www.sarrp.org

Tuesday, June 2, 2015

සර්පයින්‌ගේ වැදගත් කම

මිහිතලය මත වසන සෑම සත්ව ‌කොට්ඨාශයක් ‌මෙන්ම සර්පයින්ද මිහිතලයේ පැවැත්මට යම්‌ ‌මෙ‌හෙයක් සිදු කරයි. එසේම පරිසර විද්‍යාත්මක සමතුළිතතාවය (ecological balance) පවත්වා ගැනීමට සර්පයින් වැදගත් වේ.ලංකා‌වේ ‌‌ෙ‌ජෙව විවිධත්වය ඉහල නැංවීමට සර්පයින්‌ගේ දායකත්වය අත්‍යාවශ්‍ය ‌වේ.
ලංකාව ඈත අතීත‌යේ සිටම කෘෂිකාර්මික රටකි. මීයන් සහ වෙනත් කෘමින් වගාවන්ට සහ ආහාර ගබඩා වලට හානි පමුනුවයි. සර්පයින් ආහාර දාම වල ඉහල මට්ටම් වල යැ‌පෙන්නන් ‌වේ. ඔවුන් විසින් මීයන් හා විවිධ කෘමි සතුන් ආහාරයට ගනු ලබයි. එනිසා  එම සතුන් ‌ගේ ‌බෝ වීම පාලනය ‌‌වේ. එයින් වගාවන්ට විශාල ‌ලෙස පාඩු සිදු වීම වැළ‌කේ.
මීයන්ගේ මල සහ මුත්‍රා මගින් මී උණ වැනි වැනි වසංගත තත්වයන් පැතිර යයි. සර්පයින් යනු මීයන්ගේ ස්වාභාවික සතුරෙකි. සර්පයින් විසින් මීයන් ‌ගොදුරු කර ගැනීම ‌නිසා මීයන් ප්‍රමාණයට වඩා වැඩිවීම පාලනය වේ. එය වසංගත මර්ධනයට පිටිවහලක් ‌වේ.
සර්ප විෂේ අන්තර්ගත විවිධ සංඝටක වල විෂේෂිත කෘතයන් නිසා නූතන‌ෙ‌වෙද්‍ය විද්‍යා‌වේ. ඇතැම් ඖෂධ නිපදවීමට සර්පයින්ගේ විෂ උප‌යෝගී කර ගනී. ‌බෝ‌හෝ විට සර්පයින් දෂ්ඨ කල විට ලබා ‌දෙන ප්‍රති විෂ ( Anti venom  serum /AVS) නිෂ්පාදනය සඳහා ‌‌යොදා ගනු ලබන්‌නේ සර්ප විෂයි.
පිළිකාසරම්ප, හි‌මෝෆීලියාව, ඇතැම් ස්නායු ‌රෝග, ලාදුරු, රූමටික උණ, මහාමාරිය, ඇදුම වැනි ‌රෝග සඳහාද මර්ධනය කළ සර්ප විෂ ‌යොදා ගන්නා බව කිය‌වේ.
කායික විද්‍යාව (physiology), ජෛව රසායනික විද්‍යාව (biochemistry) , ප්‍රතිශක්ති විද්‍යාව (immunology) වැනි විෂය ක්ෂේත්‍ර වල පරීක්ෂණ කටයුතු සදහා සර්ප විෂ යොදා ගනී.
ලංකාව ඇතුලු දකුණු ආසියාතික රටවල විවිධ ජන ‌කොට්ඨාශ වල ජීවිකාව සර්පයින් මත  රැදී ති‌බේ. වි‌ශේෂ‌යෙන්ම අහිගුන්ඨක ජන ‌කොධ්ඨාශ  නයින් නැටවීම මගින් තම ජීවිකාව පවත්වා ගනී.


ඡායාරූප
http://www.nj.com/news/index.ssf
http://content.time.com/


Friday, April 3, 2015

සර්පයන්ට ඇති තර්ජන සහ සංරක්ෂණය- 2

පසුගිය දශක ගණනාව තුළ ශ්‍රී ලංකාවේ වන විනාශය සීඝ්‍රයෙන් සිදු විය. නාගරිකකරණය, වගාවන් පිණිස වනාන්තර විනාශ කිරීම මේ වන විටත් සිදුවෙමින් පවතී. මේ නිසා සර්පයින් පමණක් නොව අනෙකුත් බොහොමයක් වනජීවීන්ගේද වාසස්ථාන අහිමි වී යයි.
කෘෂි කාර්මික කටයුතු වලදී යොදා ගන්නා  කෘෂි රසායනික ද්‍රව්‍යයන්ද සර්පයින්ට තර්ජනයක් ඇති කරනු ලබයි. වගාවන් සදහා යොදා ගන්නා කෘමිනාශක මෙන්ම වල්නාශකද සර්ප ගහණය අඩු කිරීමට හේතු වෙයි. නයිට්‍රිජන් අඩංගු පොහොර වර්ග වල අධි භාවිතයද මොවුනට අහිතකර ලෙස බලපානු ලබයි. මෙම රසායනික ද්‍රව්‍යය තවත් ආකාරයකින් සර්පයින්ගේ ආහාර වන කෘමීන් ගෙම්බන් මීයන් වැනි සතුනගේ ගහණය අඩු කිරිමටද හේතු වේ. 

ගෝලීය උෂ්ණත්වය ඉහල යෑම, වාර්ශික වර්ෂාපතනය අඩුවීම වැනි දේශගුණ වෙනස්වීමද ඇතැම් විශේෂ කෙරෙහි අහිතකර ලෙස බලපෑම් ඇති කරනු ලබයි. සමහර සර්ප විශේෂ වලට ජීවත් විම සදහා අඩු උෂ්ණත්ව අවශ්‍ය වේ. උදාහරණයක් ලෙස මැඩිල්ලන් (Aspidura spp) , නිහලුවා(Balanophis ceylonensis), දාර රදනකයා (Cercaspis carinatus  ), කුරන් කරවලා(Haplocercus ceylonensis), වැනි විශේෂ වලට ජීවත් විම සදහා 25°C වලට වඩා අඩු උෂ්ණත්ව මෙන්ම තෙතමණයෙන් යුක්ත කොළරොඩු සහිත පරිසරයක් අවශ්‍ය වේ. මෙම තත්ව නොමැති වුවහොත් මොවුන් මිය යෑමට පුලුවන. (de. Silva 1980,1987).
මුහුදු සර්පයින්ට එල්ලවි ඇති ප්‍රබලතම තර්ජනයවන්නේ ධීවරයින් විසින් මරා දැමීමයි. මීට අමතරව තෙල් වැනි ද්‍රව්‍යය නිසා මුහුදු ජලයේ සිදුවන දූෂණයද   මුහුදු සර්පයින්ට අහිතකර ලෙස බලපෑම් ඇති කරයි.  
ශ්‍රි ලංකාව යනු සර්පයින්ගේ විවිධත්වය අධික රටකි. එමෙන්ම මෙරටට ආවේණික වූ විශේෂ බොහොමයක් හමුවේ. නමුත් දියුණු යැයි කියා ගන්නා මිනිසුන් විසින්ම සිදු කරන ක්‍රියා හේතුවෙන්  සර්ප ගහණය සීඝ්‍රයෙන් අඩු වෙමින් පවතී. මේ නිසා බොහොමයක් විශේෂ වද වීමේ තර්ජනයටද මුහුණ පා සිටී. මේ වන විට මෙරට වෙසෙන බොහෝ සර්ප විශේෂ IUCN රතු දත්ත පොතට ඇතුලත්ව ඇත.

2007 රතු දත්ත වාර්තාවට අනුව මෙරට අවදානමට ලක් වී ඇති සර්ප විශේෂ

(Red list of threatened fauna and flora of Sri Lanka 2007)

Critically Endangered –CR

 Gerarda prevostiana  පොවොස්ටිගේ දිය බරියා
 Aspidura deraniyagalae කදු මැඩිල්ලා
 Aspidura drummondhayi කෙටිවල් මැඩිල්ලා

Endangered –EN

Acrochordus granulatus රෙදි නයා දිය ගොයා

Vulnerable –VU

Gongylophis conicus වැලි පිඹුරා
 Cercaspis carinatus  දාර රදනකයා
Chrysopelea taprobanica දගර දන්ඩා
Dendrelaphis caudolineolatus  වයිරි හාල්දන්ඩා
 Liopeltis calamaria පන්බරියා
 Oligodon calamarius   කබර දත්කැටියා
Cerberus rynchops   කුනු දිය කලුවා
 Balanophis ceylonensis  මල් කරවලා නිහලුවා
Echis carinatus  වැළි පොළගා

Near Threatened – NT

Ahaetulla pulverulenta  හෙනකදයා
Boiga barnesii පදුරු මාපිලා
Chrysopelea ornata  පොල්මල් කරවලා
 Dryocalamus nympha ගැට කරවලා
Cylindrophis maculatus දෙපත් නයා වටඋල්ලා
Bungarus ceylonicus  මුදු කරවලා
 Calliophis melanurus  දෙපත් කලුවා
Aspidura brachyorrhos  ලේ මැඩිල්ලා
Aspidura guentheri  කුඩා මැඩිල්ලා
Aspidura trachyprocta දලව මැඩිල්ලා
Macropisthodon plumbicolor  පලාබරියා
 Hypnale nepa   කදුකර මූකලන් තෙලිස්සා

Data Deficient – DD

Argyrogena fasciolata  වල් ගැරඩියා
Boiga beddomei  කහ මාපිලා
 Dendrelaphis oliveri  ඔලිවර්ගේ හාල්දන්ඩා
Dryocalamus gracilis මීගැට කරවලා
Haplocercus ceylonensis කුරන් කරවලා රත් කරවලා
Ramphotyphlops  දුමුටු කණඋල්ලා
Typhlops ceylonicus ස්මිත්ගේ කණඋල්ලා
Typhlops lankaensis ලක් කණඋල්ලා
 Typhlops leucomelas කබර කණඋල්ලා
Typhlops malcolmi මැල්කම්ගේ කණඋල්ලා
Typhlops mirus  හීන් කණඋල්ලා
Typhlops porrectus ස්ටොලික්ස්කාගේ සිහින් කණඋල්ලා
Typhlops tenebrarum ටේලර්ගේ කණඋල්ලා
Typhlops veddae වැද්දාගේ කණඋල්ලා
Typhlops violaceus දම් කණඋල්ලා
Platyplecturus madurensis මදුරාසි  බිංඋල්ලා
Pseudotyphlops philippinus මහ බිංඋල්ලා
Rhinophis blythii ගෝමර තුඩැල්ලා
Rhinophis dorsimaculatus තම්බපන්නි වල්ගා ඇබයා
Rhinophis drummondhayi තපෝ තුඩැල්ලා
Rhinophis erangaviraji  එරංග විරාජ්ගේ තුඩැල්ලා
 Rhinophis homolepis  දෙපත් තුඩැල්ලා
Rhinophis oxyrhynchus උල් තුඩැල්ලා
Rhinophis philippinus කුවියර්ගේ වල්ගා ඇබයා
 Rhinophis porrectus  දික් තුඩැල්ලා
Rhinophis punctatus තිත් තුඩැල්ලා
Rhinophis tricoloratus  දැරණියගලගේ වල්ගා ඇබයා
Uropeltis melanogaster කලු වකටුල්ලා
Uropeltis phillipsi ඉරි වකටුල්ලා
Uropeltis ruhunae රුහුනු වකටුල්ලා

මිට පෙරද සදහන් කල පරිදි සර්පයින් යනු පාරිසරික සමතුලිත තාවය පවත්වාගෙන යෑම සදහා අත්‍යවශ ජීවී කාණ්ඩයකි. මේ නිසා මොවුන් වද වීමට ලක් නොවී ආරක්ෂාකර ගැනීම සදහා සුදුසු සංරක්ෂණ ක්‍රමවේද අනුගමනය කල යුතුයි. මිනිසුන් විසින් සර්පයින් බොහෝ දෙනෙකු මරා දමන්නේ ඔවුන් පිළිබදව ඇති නොදැනුවත් කම හේතුවෙනි. එනිසා ප්‍රජාව දැනුවත් කිරීමේ වැඩසටහන් මෙන්ම සිසුන් සදහා අධ්‍යාපනික ක්‍රියාකාරකම් සංවිධානය කිරීමේ අවශතාවය පැන නැගී ඇත. එමෙන්ම නිවෙස් තුළට පැමිනෙන  සර්පයින් නොමරා නැවතත් වනාන්තර වලට යොමු කිරිම ඕනෑම පුද්ගලයෙකුට කළ හැකි දෙයකි.
කෙසේ වෙතත් අප පරිසරයෙන් නුදුරු අනාගතයේදිම තුරන් වි යාමට නියමිත මෙම සත්ත්ව කාණ්ඩය ආරක්ෂා කර ගැනීම අප සැමගේම යුතුකමක් මෙන්ම වගකීමක්ද වේ.