පොළොං තෙලිස්සා… කුණකටුවා Hump-nosed Pit Viper

පොලොංතෙලිස්සා එහෙමත් නැත්නම් කුණකටුවා කියලා හදුන්වන්නේ අපේ රටේ තරමක් විතර බහුලව හමුවෙන සර්පයෙක්. ඉංග්‍රීසි භාෂාවෙන් Merrem's Hump-nosed Pit Viper  කියලා හදුන්වන මේ සර්පයා Hypnale hypnale කියන විද්‍යාත්මක නමෙන්  හදුන්වනවා. මේ සර්පයා මෙන්න මේ විදිහට විද්‍යාත්මකව වර්ග කරන්න (Scientific classification) පුලුවන්.

                                                                                                                                

Kingdom	Animalia
Phylum:	Chordata
Subphylum:	Vertebrata
Class:	Reptilia
Order:	Squamata
Suborder:	Serpentes
Family:	Viperidae
Subfamily:	Crotalinae
Genus:	Hypnale

කුණකටුවා බොහෝ වෙලාවට දිවයිනේ අතරමැදි සහ වියළි කලාපයේ කෘෂිබිම් වල වගේම මිනිස් වාසස්ථාන වලත් හමුවෙනවා. ඒ වගේම තේ ,රබර්, පොල්, කොකෝවා වතු ආශ්‍රිතවද හමුවෙනවා. මෙයා නිශාචර සර්පයෙක්. ඒ වගේම භෞමික වාසී  සර්පයෙක්.

සිලින්ඩරාකාර ශරීරයක් දරන මේ සර්පයාගේ ගෙල පැහැදිලිව ගෙලෙන් වෙන් වෙලා තියෙනවා.ඒවගේම  තරමක් ත්‍රිකෝණාකාර මහත හිසක් මෙයාලට තියෙනවා. පෘෂ්ඨයක් මතුපිට ඉන්න කොට හිස අංශක 45කින් පමණ ඔසවාගෙන සිටිනු දකින්න පුලුවන්.

 කුඩා නාස් පුඩු දරන මේ සර්පයාට මදක් ඉදිරියට නෙරූ දුඹුරු පාට ඇස් පිහිටලා තියෙනවා.

විවිධ වර්ණ වලින් යුක්ත සතුන් හමුවෙනවා ඒ කියන්නේ මෙයාලගේ වර්ණ වෙනස්කම් රාශියක් තියෙනවා.  බොහෝ විට අදුරු දුඹුරු පාටයි. ඇතැම් විට තද දුඹුරු පාටින් යුක්ත වෙනවා. ශරීරයේ කලු පාට පැල්ලම් දකින්නත් පුලුවන්.

මධ්‍යම ප්‍රමාණයේ විෂ සහිතයි.  ඒ වුනත් මේ සර්පයා දෂ්ඨ කිරීම නිසා මරණ වාර්තා වෙලා තියෙනවා කියලත් සමහරු කියනවා. කොහොම උනත් මේ සර්පයා දෂ්ඨ කලාම තුවාලය අවට දැඩි වේදනාවක් ඇතිවෙනවා.

රාත්‍රී කාලයට ක්‍රියාශ්‍රීලි වෙන මේ සර්පයා දිවා කාලයේ දිරාගිය කොළ රොඩු, ගල් කොටන් යට හැංගිලා ඉන්නවා.  රාත්‍රී කාලයේදී සිදුවූ පහරදීම් වාර්තා වෙනවා. කුපිත වුන වෙලාවට වලිගය තදින් සෙලවීමක් මේ සර්පයාගෙන් දැක ගන්න පුලුවන්.

35 cm පමණ දිගකට වැඩෙන කුණකටුවා කුඩා සර්ප බිත්තර, කුඩා ක්ෂීරපායින්,  සිකනලුන්, ගෙම්බන් ආහාරයට ගන්නවා.

වැඩුනු ගැහැණු සතුන් මාර්තු ජුලි අතර කාලයේ පැටවු දැමීම සිදු කරනවා. වරකට පැටවුන් 7ත් 14ත් අතර සංඛ්‍යාවක් උපත් ලබන් අතර උපතේදී මේ සර්පයින් 15cm දිගකින් යුක්ත වෙනවා.

කුණකටුවා Hump-nosed Pit Viper  

                                                                               (ඡායාරූපය- www.naturephoto-cz.com)